පිරිසිඳු බුදු දහම කාලාන්තරයක් තිස්සේ බොදුනුවන්ගෙන් ඈත් කිරීමේ ප්‍රතිඵලයක් ලෙස මිථ්‍යා ධර්ම අන්ධ බොදුනුවන් මහා පරිමාණයෙන් ගොදුරු කරගන්නා බව පෙනෙයි. පුවත් පත් පිටු පුරා කෝවිල් කපුවන්, නැකැත් කරුවන්, වාලම්පුරී වෙළෙන්දන්, වාස්තු විද්‍යා කරුවන්, වශී, හදි හූණියම් කරුවන්, ෆෙං ෂුයි ප්ලාස්ටික් අපද්‍රව්‍ය කරුවන් ආදී වංචනිකයන් හතු පිපෙන්නා සේ බිහිවෙමින් යයි. මේ අන් කිසිවෙක් නොවේ තම ජීවනෝපාය කර ගැනීමට කිසිදු සාස්ත්‍රයක් කර ගැනීමට නොහැකිව අතරමං වූවන්ගේ ගැලවීමේ උපායයි. නූගතුන් රවටමින් කිසිදු අර්ථයක් ප්‍රතිපලයක් නැති බහුබූත කරමින් වංචනිකව මුදල් ගැරීමේ මාර්ගයයි. නිවනින් ඈතින් ඈතට යමින් අපායටම යොමු කරගත් ඔවුන්ගේ මිච්ඡා ආජීවයයි.

උදාහරනයක් ලෙස වාස්තු විද්‍යාව ගනිමු. ගෙයක් තැනීමට යාමේදී තනන්නා ගේ ඉහ මොළ රත්වන රීති ගොඩනැගිල්ලට යෙදීමට මේ උපදෙස් කරුවන් පසුබට නොවේ. සාදා නිමවූ ගොඩ නැගීමක් ඒ අනුව කඩා දැමීමට තරම් අන්ධ භක්තිකයා බියට පත්වේ. මන්ද වාස්තු විද්‍යා නීති කැඩීම මරණය පවා ගෙන දීමට සමත් යැයි පැවසීමට තරම් මේ බොරු කාරයන් පසුබට නොවීමයි. මරණය ගැන බුද්ධ දේශණය ඉතා පැහැදිළිය. පුද්ගලයෙක් මියයන හේතු ඇත්තේ 4ක් පමණි. ඒවා අතර කිසිදු වාස්තු විද්‍යා හේතුවක් ඇත්තේ නැත. තිබේ නම් සර්වඥ වූ බුදු පියාණන්ට නොපෙනීමට කිසිදු හේතුවක් නැත.

මෙය සිතා බලා තේරුම් නොකරගන්නා නිවාස හිමිකරු සුභ ඵල සොයමින් තම ආථිකය අසුභ කරගන්නේ සුලු වියදමකින් පිරිසිඳුව කරගත හැකිව තිබූ ගොඩනැගීම අනේක විධ වැල්වටාරම් කරමින් දෙගුණ තෙගුණ වියදම් වීත් අවසන් කරගත නොහැකිව ලත වීමයි. විවෘත මනසින් බැලූ විට නිවාස තනන්නාගේ ඉහලම අසුභ ලකුණ වාස්තු විද්‍යා කරුවායි. මෙසේ උපදෙස් දෙන අයගේ උපදෙස් පිළිගැනීමට පෙර ඔවුන් වෙසෙන නිවාස වලටම එම නීති යොදා බලන අයෙක්ට කැඩූ වාස්තු විද්‍යා නීති කප්පරක් සොයා ගත හැකි වනු ඇත.

මේ ආකාරයටම දෙවියන්ගේ පිහිට කියමින් මල පෙරේතයන්ගේ පහත් පිහිට කෝවිල් පසුපස යන්නාට ලැබේ. පරිත්‍රාන බලයෙන් අනන්ත ආරක්ෂාවක් අමනුෂ්‍යයන්ගේන් නොමිළයේ ලබා ගැනීමට හැකි බව නොදත් බොදුනුවා ප්‍රේත ආවේශවීම් වලට පවා නිකරුනේ ලක්වීම සිදුවේ. බාලයා මුදල් ගෙවා කරදර ලං ගන්නේ එලෙසය. නැකැත් කරුවා සුභ වේලාවන් කියමින් යමෙක්ට ඉතාම පහසු වූ සුභ වේලාව වෙනුවට අතිශය දුෂ්කර අසුභ වේලාවන් සාදා දී මුදල් ගරයි. මිථ්‍යාවෙන් අන්ධව එම වේලාව සුභ යැයි පිළිගන්නා තැනැත්තා මනෝ දුෂ්චරිතයක් තුලින් සිත කිළිටිකරගෙන සිටින බැවින් සාදා දුන් වෙලාව බුදු දහමට අනුව නම් අසුභ වෙලාවම බව දත යුතුය.

කිසිදු නැකත් කරුවෙකුට මුදල් නොපුදන පිරිසිඳු බෞද්ධයා පන්සිල් සමාදන් වී, කාය වාග්, වචී දුෂ්චරිත අත්හැර සිය සුභ මොහොත තමා තුලින්ම පහසුවෙන් උපදවාගෙන සියළු යහ ප්‍රාර්ථනා එහි බලයෙන්ම ඉටු කරගනී. වාළම්පුරී කෝළම්කරුවෝ, අනේක විධ රත්න වර්ග වලින් අපල දුරු කරන්නෝ, ෆෙං ෂුයි ප්ලාස්ටික් අපද්‍රව්‍ය වලින් මුදල් වාසනා සොයන්නෝ, බාහිර වස්තු වලින් ලෝක පාලක නියාම ධර්ම වෙනස් කිරීමට උත්සාහ කරන්නෝය. තමාගේ කර්ම ඵල දෙනවිට ලෝකව්‍යවහාර වචනය අපල සේ සැලකිය හැක. මිලට ගත් වස්තුවක්, කොහේවත් ඇති සෙනසුරෙක්, තරුවක් පුද්ගලයන් තනි තනිව රැස්කල කර්ම අහෝසි කිරීමට සමත්නම් බුදුවරුන්ට පවා වෙනස් කල කොහැකි බුද්ධ දේශිත කර්ම නියාම ධර්මය බොරු විය යුතුය.

වශී හදි හූණියම් ගුප්ත විද්‍යා සේ ගැනෙන නමුත් අද දින වන විට මේවා කිසිවක් හරියට කරගැනීමට සමත් ජගතුන් නැත. ඔවුන් ගුරුමුෂ්ඨි හා සාස්ත්‍ර සමඟ අතුරුදන් වී බොහෝ කල්ය. කණින් කොනින් මේවා ගැන අසා ඇති බොරු කාරයන් මහා පරිමාණ මුදල් ගැරීම් සඳහා උපාසක චන්ඩාල පිළිකුල් කිළිටන් ගොදුරු කරගැනීම පමණක් ජයටම සිදුවේ. මෙවන් ගුරුකම් කරන කපුවන් පවා තමාගේ පුද්ගලික වශී හදි හූණියම් පාපී අවශ්‍යතාවන් වෙනුවෙන් තවත් එවන්ම බොරුකාරයන්ට මුදල් ගෙවා රහසේ සේවය ලබා ගැනීම කෙළවරක් නොමැතිව සිදු වන්නේ මේ නිසාය.

පිරිසිඳු බොදුනුවා කිසිවිටෙකත් රත්නත්‍රයෙන්, පරිත්‍රාන බලයෙන් පිට පිහිට ආරක්ෂාවක් නොසොයයි. එසේ සොයන්නා සමාන කල හැක්කේ හිරුගේ ආලෝකය අඳුර නැසීමට ප්‍රයෝජනයට ගැනීම ප්‍රතික්ෂේප කර කණා මැදිරියන් බෝතල් කර ආලෝකය ලැබීමට සිතන අනුවණයන්ටය. මෙවන් මිථ්‍යාවන් බුදුන් දුටු අයුරු අපි කලින් නිපාත ඔස්සේ පෙන්වා දුන්නෙමු. බුද්ධ නීති ඔස්සේත් ඒවා දහම තුල තහවුරු කර ඇත්තේ මෙසේයි.

පරම පූජණීය රේරුකානේ චන්ද විමල මාහිමි සම්පාදිත බුද්ධ නීති සංග්‍රහය පොත් වහන්සේ තුල අඩංගු 

බුද්ධ නීති

බුද්ධ නීති සංග්‍රහය එකොළොස්වන මුද්‍රණය -2012

සතරවන  ශතකය

11. නැකැත් බලමින් කල යුත්ත පසු කරන්නාවූ මෝඩයා හට අර්ථය ඉක්ම යන්නේය. බලාපොරොත්තු වන අර්ථය සිදු වේ නම් එයම නැකතය. අහසේ තරු කුමක් කෙරේද? (පිටුව 105).

චතු සත්‍ය අවබෝධය අරමුණු කරමින් බෝධි  (සෝවාන් හෝ සෙදගැමි හෝ අනාගාමී හෝ අරහත් හෝ පසේ බුදු හෝ බුදු ) ප්‍රාර්ථනා පුරණ බෞද්ධ ඔබ කිසිවිටෙකත් මෙවන් වංචාවල ගොදුරක් නොවේවා!